धनुष्यबाणावरुन शिवसेना व शिंदे गटात संघर्ष; ठाकरेंनी उचलली सावध पावलं, चिन्हासाठी आयोगाकडे कॅव्हेट

0
29

मुंबईः एकनाथ शिंदे यांच्या बंडखोरीनंतर शिवसेना पक्षात उघड उघड दोन गट पडले असून काही नेते मुख्यमंत्री एकनाथ शिंदे यांना, तर काही नेते शिवसेना पक्षप्रमुख उद्धव ठाकरे यांना समर्थन देताना दिसत आहेत.

शिवसेनेतील ४० आमदारांनी बंडखोरी केल्यामुळे शिवसेना पक्षाचे धनुष्यबाण हे चिन्हदेखील जाऊ शकते, या चर्चेला तोंड फुटले आहे.

या सर्व पार्श्वभूमीवर खबरदारीचा उपाय म्हणून शिवसेनेने थेट केंद्रीय निवडणूक आयोगाकडे धाव घेत एक कॅव्हेट दाखल केले आहे.

आमची बाजू ऐकून घेतल्याशिवाय धनुष्यबाण या चिन्हाविषयी कोणताही निर्णय घेऊ नये, अशी विनंती शिवसेनेने या कॅव्हेटच्या माध्यमातून केली आहे.

त्यामुळे नजीकच्या काळात धनुष्यबाणावरून शिवसेना आणि एकनाथ शिंदे गट यांच्यात जोरदार संघर्ष छेडला जाण्याची शक्यता आहे.

एकनाथ शिंदे यांच्या समर्थनार्थ तब्बल ४० आमदारांनी उद्धव ठाकरे यांच्याविरोधात बंड केल्यानंतर आता काही खासदारदेखील शिंदे गटात सामील होण्याची शक्यता व्यक्त केली जात आहे.

स्थानिक पातळीवर काही नगरसेवक आणि कार्यकर्तेदेखील एकनाथ शिंदे यांना पाठिंबा देताना दिसत आहेत. या सर्व घडामोडी घडत असताना शिंदे गटाने आम्हीच खरी शिवसेना आहोत, असा दावा केला आहे. आगामी काळात शिंदे गटाकडून शिवसेनेच्या धनुष्यबाण या निवडणूक चिन्हावरदेखील दावा केला जाऊ शकतो.

त्यामुळे यावर खबरदारीचा उपाय म्हणून उद्धव ठाकरे यांनी केंद्रीय निवडणूक आयोगाकडे कॅव्हेट दाखल केले आहे. यामध्ये आमची बाजू ऐकून घेतल्याशिवाय शिवसेनेच्या धनुष्यबाण या निवडणूक चिन्हावर कोणताही निर्णय घेऊ नये, अशी मागणी केली आहे.