Shiv Sena Dussehra Rally: शिवाजी पार्क मैदानावरील दसरा मेळाव्यावरून उद्धव ठाकरे गट आणि एकनाथ शिंदे गटात रस्सीखेच सुरु आहे. आता मंगळवारी या मेळाव्यासंदर्भात उद्धव ठाकरे गटाने मोठी घोषणा केली आहे.
बृहन्मुंबई महानगरपालिकेने (बीएमसी) मान्यता दिली किंवा नाही दिली तरीही पक्षाचा वार्षिक दसरा मेळावा शिवाजी पार्क मैदानावर आयोजित करणार असल्याचे उद्धव ठाकरे यांच्या नेतृत्वाखालील शिवसेनेने सांगितले.
मुंबईचे माजी महापौर मिलिंद वैद्य यांच्या नेतृत्वाखाली शिवसेना नेत्यांच्या शिष्टमंडळाने रॅली काढण्याच्या परवानगीसाठी केलेल्या अर्जाची स्थिती जाणून घेण्यासाठी नागरी अधिकाऱ्यांची भेट घेतली.
परवानगी मिळो अथवा न मिळो, आम्ही शिवाजी पार्कवर जमणार आहोत, प्रशासनाने आम्हाला परवानगी दिली अथवा नाकारली तरी आम्ही आमच्या निर्णयावर ठाम आहोत.
रॅलीत दोन्ही गट आमने-सामने
आम्हाला उत्तर मिळाले नाही, तर बाळासाहेबांचे शिवसेना कार्यकर्ते दसरा मेळाव्यासाठी शिवाजी पार्कवर जमतील, असे ते म्हणाले.
ठाकरे यांच्या नेतृत्वाखालील गट आणि महाराष्ट्राचे मुख्यमंत्री एकनाथ शिंदे यांच्या नेतृत्वाखालील शिवसेना गट या दोघांनीही मुंबईतील शिवाजी पार्कवर दसरा मेळावा आयोजित करण्याची परवानगी मागितली आहे.
शिवसेना स्थापनेपासून याच ठिकाणी दसरा मेळावा घेत आहे. मात्र बीएमसीने अद्याप कोणताही निर्णय घेतलेला नाही. दोन्ही गटांनी पर्याय व्यवस्था म्हणून वांद्रे कुर्ला कॉम्प्लेक्सच्या (बीकेसी) एमएमआरडीए मैदानावर रॅली घेण्याच्या परवानगीसाठी अर्जही केला आहे. मात्र, गेल्या आठवड्यात बीकेसीत सभा घेण्यासाठी शिंदे गटाला परवानगी देण्यात आली आहे.
शिवसेनेला परवानगी द्यावी : पवार
दरम्यान, उद्धव ठाकरे यांच्या नेतृत्वाखालील शिवसेनेला शिवाजी पार्कवर सभा घेण्याची परवानगी द्यावी आणि परवानगी न मिळाल्यास त्यांनी कायद्याचा आधार घ्यावा, असे राष्ट्रवादी काँग्रेसचे नेते अजित पवार म्हणाले.
महाविकास आघाडीतील ठाकरे यांच्या नेतृत्वाखालील शिवसेनेचे सहयोगी पवार म्हणाले की, शिंदे गटासाठी बीकेसी मैदान उपलब्ध करून दिल्यास, उद्धव ठाकरे यांच्या नेतृत्वाखालील गटाला शिवाजी पार्कवर सभा घेण्याची परवानगी द्यावी.
