टिटवाळा : लग्नासाठी प्रयत्न करत असताना प्रियकराने मित्राच्या मदतीने प्रेयसीची 35 वार करून हत्या केल्याची धक्कादायक घटना टिटवाळा येथे उघडकीस आली आहे.
रुपांजली जाधव असे या महिलेचे नाव असून ती पुण्यात राहत होती. टिटवाळा येथे तिचा मृतदेह आढळून आला. मृतदेहाजवळ तिचे आधारकार्ड सापडले, त्या आधारे पोलिसांनी तिची ओळख पटवली.
या हत्येप्रकरणी पोलिसांनी प्रियकरासह त्याच्या मित्राला अटक केली आहे. जयराज चौरे आणि सूरज घाटे अशी अटक केलेल्या दोन आरोपींची नावे आहेत.
टिटवाळा येथे महिलेचा मृतदेह आढळून आला
टिटवाळ्यातील गोवेली परिसरात 12 डिसेंबर रोजी एका महिलेचा मृतदेह आढळून आला होता. या महिलेवर धारदार शस्त्राने तब्बल 35 वार करण्यात आले. याप्रकरणी टिटवाळा पोलिसांनी गुन्हा दाखल करून तपास सुरू केला आहे.
पोलिसांनी आधारकार्डच्या आधारे महिलेची ओळख पटवली
पोलिस तपासात महिलेकडे तिचे आधार कार्ड सापडले. या आधारकार्डच्या आधारे टिटवाळा पोलिसांनी मृत महिलेच्या नातेवाईकांशी संपर्क साधून मृत महिलेची ओळख पटवली. यानंतर पोलिसांनी हत्येचा कसून तपास सुरू केला.
पोलिस तपासादरम्यान महिलेचे प्रेमसंबंध माहिती मिळाली
तपासात महिलेचे नाव रूपांजली जाधव असून ती विवाहित असून तिला तीन मुले असल्याचे पोलिसांना आढळून आले. तसेच रुपांजलीचे पुण्यात राहणाऱ्या जयराज चौरेसोबत दोन वर्षांपासून प्रेमसंबंध असल्याची माहिती पोलिसांना मिळाली.
प्रेयसीने लग्नासाठी तगादा लावला
पोलिसांनी तिचा प्रियकर जयराम याला ताब्यात घेऊन चौकशी सुरू केली. पोलिसांनी त्याला खाक्या दाखवताच आरोपीने गुन्ह्याची कबुली दिली. जयराजच्या म्हणण्यानुसार, रुपांजली त्याला लग्नासाठी विचारून ब्लॅकमेल करत होती.
शेवटी जयराजने रुपांजलीला मारण्याचा निर्णय घेतला. त्याने मित्र सूरज घाटे यांना सोबत घेऊन रुपांजलीच्या हत्येचा कट रचला. त्यासाठी त्याने उल्हासनगर येथून दोन चाकूही खरेदी केले.
टिटवाळ्यात दागिने खरेदीच्या बहाण्याने हत्या
तिला दागिने देतो असे सांगून तो रुपांजलीला टिटवाळ्यात घेऊन येतो. टिटवाळ्यातील गोवेली परिसरात जयराज आणि त्याचा मित्र सूरज घाटे यांनी रूपांजलीवर धारदार शस्त्राने वार करून तिची हत्या करून तेथून पळ काढला. अखेर टिटवाळा पोलिसांनी जयराज आणि त्याचा मित्र सूरज या दोघांनाही अटक केली आहे.
