मुंबई : पत्राचाळ जमीन घोटाळा प्रकरणी शिवसेनेचे खासदार संजय राऊत यांना अखेर 100 दिवसांनी जामीन मंजूर झाला आहे. त्यानंतर राजकीय वर्तुळातून प्रतिक्रिया येऊ लागल्या आहेत.
ठाकरे गटाच्या उपनेत्या सुष्णा अंधारे यांनी ट्विट करून न्यायालयाच्या निर्णयाचे स्वागत केले आहे. ‘टायगर इज बॅक’ अशी प्रतिक्रिया दिली आहे.
आज आमच्यासाठी दिवाळीचा मुहूर्त असून शिवसैनिकांमध्ये हजार हत्तींचे बळ पसरले आहे, अशी प्रतिक्रिया सुषमा अंधारे यांनी एबीपी माझाला दिली आहे.
Tiger is back… !!!! @AUThackeray @SaamanaOnline
— SushmaTai Andhare (@andharesushama) November 9, 2022
सुषमा अंधारे म्हणाल्या, शिवसैनिकांमध्ये हजार हत्तींचे बळ पसरवणाऱ्या संजय राऊत यांचा आम्हाला अभिमान आहे. आज आपल्यासाठी दिवाळीचा क्षण आहे.
आज खऱ्या अर्थाने दिवाळी आहे आणि आपण ती उत्साहात साजरी करणार आहोत. आजचा दिवस आमच्यासाठी महत्त्वाचा आहे.
आमचा सेनापती परत आला आहे. त्यामुळे आम्हा सर्व शिवसैनिकांना हजार हत्तींचे बळ मिळाले आहे. आमच्यासाठी हा आनंदाचा क्षण आहे.
संजय राऊत हे आमच्यासाठी आदर्श
संजय राऊत यांच्या धाडसाचे कौतुक करायला हवे. तुम्हाला वाटेल ते करा, मी मरेन पण शरणागती पत्करणार नाही हा संजय राऊत यांनी दाखवलेला स्वाभिमानी बाणा आमच्यासाठी आदर्श आहे.
आणखी एक गोष्ट म्हणजे संजय राऊत हे तुरुंगात असलेल्या चौघांसाठीही आदर्श आहेत. तुमचं काही चुकलं नसेल, तर घाबरायची गरज नाही, असंही सुषमा अंधारे म्हणाल्या.
भांडुपमध्ये घराबाहेर शिवसैनिकांचा जल्लोष
संजय राऊत यांना जामीन मंजूर होणे हा ठाकरे गटासाठी मोठा दिलासा असल्याचे बोलले जात आहे. तसेच भांडुपमधील संजय राऊत यांच्या घराबाहेर शिवसैनिकांचा जल्लोष पाहायला मिळत आहे.
दुपारी तीन वाजता संजय राऊत यांच्या घराबाहेर शिवसैनिक जल्लोष करणार आहेत. संजय राऊत यांच्या आईने एबीपी माझाला पहिली प्रतिक्रिया दिली आहे. “माझा मुलगा येत आहे… मी आनंदी आहे…”
शिवसेना नेते खासदार संजय राऊत यांना पीएमएलए विशेष न्यायालयाने जामीन मंजूर केल्यानंतर राऊत तुरुंगातून कधी बाहेर येणार याकडे अनेकांचे लक्ष लागले आहे.
ईडीने संजय राऊत यांच्या जामिनाला विरोध केला असून, स्थगिती देण्याची मागणी केली आहे. या जामीनाविरोधात ईडी उच्च न्यायालयात अपील करणार आहे. मात्र, सूत्रांनी दिलेल्या माहितीनुसार संजय राऊत आज संध्याकाळीच तुरुंगातून बाहेर येण्याची शक्यता आहे.
