नवी दिल्ली : श्रद्धा हत्याकांडाने समाज सुन्न केला आहे. आता या प्रकरणात रोज नवनवीन खुलासे होत आहेत. गॉडविन रॉड्रिग्स नावाच्या व्यक्तीने श्रद्धा आणि आफताबच्या नात्याबद्दल अनेक धक्कादायक खुलासे केले आहेत.
या व्यक्तीनेच आफताब श्रद्धाला मारहाण करत असल्याचा दावा केला होता. मारहाणीनंतर त्याने तिला एकदा मदत केल्याचेही त्याने सांगितले होते.
याबाबत श्रद्धा आणि तिच्या मैत्रिणीच्या व्हॉट्सअप चर्चेचे स्क्रीनशॉटही व्हायरल झाले आहेत. त्यात श्रद्धाने तिला होणाऱ्या मारहाणीचा उल्लेख केला आहे. एका वृत्तवाहिनीशी बोलताना गॉडविनने सांगितले की, त्याने 2020 मध्ये श्रद्धाला मदत केली आहे.
श्रध्दा ड्रग्ज विकण्यातही मदत करत होती
गॉडविन म्हणाला, “श्रद्धाने त्याला सांगितले की आफताब ड्रग्ज विकत आहे. त्याच्याकडे हे लोक ड्रग्ज घेण्यासाठी रात्री-अपरात्री ग्राहक म्हणून येत होते. एवढेच नाही तर, आफताबच्या गैरहजेरीत श्रद्धा स्वत: ड्रग्ज विकत होती. श्रद्धाने सांगितले की, त्याच्याकडे याचे पुरावे आहेत.”
गॉडविनने सांगितले की, “नोव्हेंबर 2020 मध्ये आफताबने श्रद्धाचा गळा दाबण्याचा प्रयत्न केला. त्यानंतर श्रद्धाने त्याच्या ऑफिसमध्ये फोन करून मदत मागितली.
गॉडविनचा भाऊ त्या ऑफिसमध्ये काम करत होता. श्रद्धाचे ऑफिस दूर होते. त्यामुळे गॉडविनच्या भावाने त्याला कॉल करून श्रद्धाला मदत करण्याची विनंती केली होती. कारण, मी तिथं जवळच राहत होतो.”
आफताबने गॉडविनसोबत केलेले गैरवर्तन
गॉडविन म्हणाला, “यानंतर मी श्रद्धाला फोन केला. मी तिला माझ्या घरी नेले. तिच्या शरीरावर अनेक खोल जखमा होत्या. हे प्रकरण समजल्यानंतर मी माझ्या मित्रासह पोलिसात गेलो. मी तिथे तक्रार दाखल केली.
गॉडविन म्हणाला, “श्रद्धा तिच्या कुटुंबीयांशी किंवा नातेवाईकांशी बोलत नव्हती. तक्रार दाखल केल्यानंतर मी श्रद्धाला माझ्या घरी नेले. त्यानंतर आफताबने श्रद्धाला फोन केला. आफताबने तिच्या पालकांशी चर्चा केल्यानंतर, श्रद्धा निघून गेली.” त्यावेळी मदत का केली म्हणून आफताबने फोनवरही तिच्याशी गैरवर्तन केल्याचा दावा गॉडविनने केला.
एका सहकाऱ्यानेही प्राणघातक हल्ला केल्याचा दावा केला
श्रद्धाचा सहयोगी कर्मचारी मित्र करणनेही या वृत्तवाहिनीशी बोलताना आफताब श्रद्धाला मारहाण करत असल्याचा दावा केला आहे. तो म्हणाला, “मला सर्वप्रथम नोव्हेंबर 2020 मध्ये श्रद्धाच्या गैरवर्तनाची माहिती मिळाली. त्याआधी ती नेहमीच आजारी असायची. मी तिला मदत करण्याचा प्रयत्न केला. तसेच काही आठवडे तिच्यावर लक्ष ठेवण्याचा प्रयत्न केला.”
श्रद्धा आफताबला तिचा नवरा मानत होती
श्रद्धा मुंबईतील एका कॉल सेंटरमध्ये काम करत होती. करण तिथे तिचा टीम मॅनेजर होता. करण म्हणाला, “मी श्रद्धाला तिच्या दुखापतीबद्दल विचारले. ते पाहून मला धक्काच बसला.
मला आश्चर्य वाटले की एखादी व्यक्ती अशा प्रकारे एखाद्याला कशी काय मारू शकते. त्यानंतर मी श्रद्धाला तिच्या सुरक्षेसाठी तिची आई आणि बहिण किंवा पोलिसांकडे जाण्याचा सल्ला दिला.
तेव्हा श्रद्धाने सांगितले कि तिचे आणि आफताबचे लग्न झाले आहे. कारण, श्रद्धाने मला सांगितले होते की आफताब तिचा नवरा आहे.”
