मुंबई : मनसे अध्यक्ष राज ठाकरे (MNS president Raj Thackeray) यांनी गुढीपाडव्याच्या मेळाव्यात राष्ट्रवादीवर जातीवादाचा आरोप केला. तेव्हापासून राज्यात राष्ट्रवादी आणि मनसे नेते यांच्यात सामना रंगला आहे.
राष्ट्रवादी काँग्रेसचे मंत्री धनंजय मुंडे यांनी राज ठाकरेंना ‘भाजपचे अर्धवटराव’ असे संबोधले आहे. त्यानंतर मनसेचे आमदार राजू पाटील यांनी धनंजय मुंडे यांना तुमची ‘करुणा’ येतेयं अशी बोचरी टीका केली आहे. करुणा या मुंडे यांच्या पत्नी आहेत. करुणा आणि मुंडे यांचे नाते सार्वजनिक नव्हते.
करुणा यांनी त्यांच्यावर शोषणाचा आरोप केल्यानंतर मुंडे अडचणीत आले होते. नंतर मुंडे यांनी करुणासोबतचे नाते कबूल केले. तरीही करुणा यांचा विषय मुंडे यांच्यासाठी वर्मी लागणारा घाव ठरणार आहे.
मुंडेंना टोमणे मारताना राजू पाटील यांनी ट्विट केले की, तुमच्या पायाखाली काय जळत आहे आणि काय टोचत आहे याची आम्हाला कल्पना आहे. त्यामुळे वायफळ बडबड करणारा राग जरी येत असला तरी तुमची अशी अवस्था पाहून आणखीच दया येते.
धनंजयराव,चौकश्यांचा गंजलेला खिळा घुसल्यामुळे तुम्हाला झालेल्या धनुर्वातातून तर ही प्रतिक्रिया आली नाही ना ? तुमच्या बुडाखाली काय जळतंय व टोचतंय याची कल्पना आहे आम्हाला. त्यामुळे तुमच्या वायफळ बडबडीचा राग जरी येत असला तरी तुमची अशी अवस्था पाहून ‘करूणा’च अधिक येते. #get_well_soon.
— Raju Patil ( प्रमोद (राजू) रतन पाटील ) (@rajupatilmanase) April 20, 2022
मनसे प्रवक्ते योगेश चिल्ले यांनी ट्विट केले आहे की, “धनंजय मुंडे हे राष्ट्रवादीचे बॉबी डार्लिंग आहेत. आयुष्यात इतकं डार्लिंग केलं, डार्लिंग केलं, तीच डार्लिंग आता अंगावर आलीय. छातीत उगाच अचानक कळ येते का?”
नवी मुंबई मनसेचे शहराध्यक्ष गजानन काळे यांनी टोमणा मारला, “अजितदादांच्या पहाटेच्या शपथविधीत फोन स्विच ऑफ करून बसले, पवारांनी डोळे वटारल्यानंतर अर्धवट आंघोळ करून साहेब माफ करा म्हणून विनवणी करू लागले. मनासारखं खातं मिळालं नाही, असं आजही दबक्या आवाजात बोलत असतात. असे हे मुंगेरीलाल राज ठाकरेंवर टीका करत आहेत.”
